ఒక్క పాల పుంతలో కొన్ని వందలకోట్ల నక్షత్రాలు ఉంటాయి. మన సూర్యుడు కూడా అలాంటి ఒక నక్షత్రమే. ఈ విశ్యంలో ఇలాంటి పాల పుంతలు కొన్ని వందల కోట్లు ఉన్నాయి. మానవునికి తెలిసినంతలో ఈ పాల-పుంతల రకాలు నాలుగు.
1. స్పైరల్ : ఒక సుడి లాగా ఉంటాయి. వాటి చుట్టు అవి తిరుగుతూ ఉంటాయి.

2. బార్డ్ స్పైరల్ : పొడవుగా ఉండి, కొనల్లో సుడిలాగా మారుతాయి.

3. ఎలిప్టికల్ : పళ్ళెం లేదా గుడ్డు లేదా బంతి ఆకారంలో ఉంటాయి ఇవి.

4. ఆకారం లేనివి : వీటికి ఒక ఆకారం అంటూ ఉండదు.

భూమి వయస్సు ఎంత?

మండిపోతున్న వాయువూ, ధూళీ నుండి దాదాపుగా 460 కోట్ల సంవత్సరాల క్రితం భూమి ఏర్పడింది. అతి పురాతన రాయి యొక్క వయస్సు 380 కోట్ల సంవత్సరాలు. భూమి ఏర్పడుతున్న సమయంలో పడ్డ ఉల్కలను కూడా శాస్త్రవేత్తలు గుర్తించారు.

భూమి ఏ ఆకారంలో ఉంది?

భూమి గోలాకారంలో లేదు. ఎందుకంటే అది తిరిగే వేగానికి భూమధ్యరేఖ దగ్గర కాస్త ఉబ్బి ఉంది. ఈ ఆకారాన్ని ‘జియోయిడ్’ అని పిలుస్తారు.

భూమి అడ్డుకొలత : భూమధ్యరేఖ వద్ద కొలత 12,757 కీ.మీ. కానీ రెండు దృవాల మధ్య కొలత భూమధ్యరేఖ వద్ద కొలత కన్నా 43 కీ.మీ తక్కువ ఉంటుంది.

భూమి చుట్టు కొలత : ఉపగ్రహాల సాయంతో తెలిసిన చుట్టు కొలత 40,075 కీ.మీ

భూమి బరువు : 5,973,600,000,000,000,000,000,000 కిలోలు. ఏమీ లేదండీ, దాదాపు 6 పక్కన 24 సున్నాలు పెట్టినన్ని కిలోలు.

భూమి తన చుట్టూ తాను తిరగటానికి పట్టే సమయాన్ని ఒక రోజు అంటాం. కానీ ఈ సమయం సరిగా ఎంత? 23 గంటలా 56 నిమిషాలా 4.09 క్షణాలు.

సూర్యుని చుట్టూ భూమి తిరగటానికి పట్టే సమయం ఒక సంవత్సరం. ఇది సరిగ్గా 365.24 రోజులు. ఈ 0.24 రోజును నాలుగు సంవత్సరాలకు ఒక సారి కలిపి ఫిబ్రవరీ 29 వస్తుంది. భూమి తిరిగే ఈ దురం 938,886,400 కీ.మీ.